Institut tarixi

Institutning tashkil etilishi va tashkil topish asoslari

Qonunchilikni tahlil qilish va tartibga solish ta’sirini baholash instituti O‘zbekiston Respublikasi Adliya vazirligi huzurida O‘zbekiston Respublikasi Prezidentining 2024 yil 24 maydagi PF–80-son Farmoniga asosan tashkil topgan.

Institut mamlakatda norma ijodkorligi va huquqni qo‘llash amaliyotini ilmiy asosda qo‘llab-quvvatlash, qonunchilikni barqaror va samarali tartibga solish mexanizmiga aylantirish hamda tartibga solish yukini qisqartirish zaruratidan kelib chiqqan holda tashkil etilgan.

Institutni tashkil etishdan ko‘zlangan asosiy maqsad — normativ-huquqiy hujjatlar va ularning loyihalari bo‘yicha qarorlar qabul qilish jarayonida dalilga asoslangan (evidence-based) yondashuvni kuchaytirish, huquqiy tartibga solishning barqarorligi, uyg‘unligi va prognoz qilinishini ta’minlash, shuningdek ortiqcha ma’muriy va iqtisodiy yuklamalarni aniqlab, ularni kamaytirishga qaratilgan tizimli takliflar ishlab chiqishdan iborat.

Institut faoliyatiga O‘zbekiston Respublikasi Adliya vazirining buyrug‘i bilan lavozimga tayinlanadigan va lavozimdan ozod etiladigan institut direktori rahbarlik qiladi.

Institut tashkil etilishining asosiy sabablari

• Ilmiy asoslangan tahlil va baholash tizimini shakllantirish — normativ-huquqiy hujjatlar va ularning loyihalarini kompleks o‘rganish, ularning ijtimoiy-iqtisodiy va huquqiy oqibatlarini prognoz qilish hamda qarorlar qabul qilish jarayonida tahliliy xulosalardan foydalanish amaliyotini kengaytirish;

• Tartibga solish ta’sirini baholash siyosatini joriy etish va rivojlantirish — huquqiy tartibga solishning maqsadga muvofiqligi, samaradorligi va muqobil yechimlarini baholashni ta’minlaydigan zamonaviy metodologiyalarni ishlab chiqish va amaliyotga tatbiq etish;

• Qonunchilik barqarorligi va huquqiy uyg‘unlikni ta’minlash — huquqiy normalarning o‘zaro bog‘liqligi, kompleksligi va izchilligi bo‘yicha monitoring o‘tkazish, kolliziya va bo‘shliqlarni aniqlash hamda ularni bartaraf etish bo‘yicha takliflar tayyorlash;

• Ortiqcha tartibga solish va ma’muriy yukni kamaytirish — fuqarolar va tadbirkorlik subyektlari zimmasiga tushadigan ortiqcha talablar va takrorlanadigan tartib-taomillarni aniqlash hamda optimallashtirish;

• Dalilga asoslangan qaror qabul qilishni kuchaytirish — statistik ma’lumotlar, monitoring natijalari va ilmiy xulosalarga asoslangan aniq takliflar ishlab chiqish.

Shu tariqa, Institut qonunchilikni takomillashtirish jarayonida “ilmiy tahlil — baholash — taklif ishlab chiqish” zanjirini tizimli yo‘lga qo‘yishga xizmat qiladi.

Institutning tarkibiy tuzilmasi

• Iqtisodiy ta’sirni baholash bo‘limi — iqtisodiy oqibatlar va moliyaviy yuklamalarni tahlil qiladi;

• Ijtimoiy ta’sirni baholash bo‘limi — aholi va ijtimoiy sohalarga ta’sirini o‘rganadi;

• Ekologik ta’sirni baholash bo‘limi — atrof-muhit va ekologik xavfsizlikka ta’sirini tahlil qiladi;

• Metodologik ta’minlash bo‘limi — RIA metodologiyalarini ishlab chiqadi;

• Qonunchilikni tizimlashtirish bo‘limi — kolliziyalar va bo‘shliqlarni aniqlaydi;

• Inson resurslari bo‘limi — kadrlar va hujjatlarni boshqaradi;

• Xalqaro hamkorlik mutaxassisi — xalqaro loyihalar va hamkorlikni rivojlantiradi.